俾楊森公開稱讚肯講出商界憂慮嘅胡應湘，近日上過北京，八方自然要問吓佢中央有冇最高指示，點知佢話今次冇傾政制檢討問題，只係去搵啲工程設計人士講吓港珠澳大橋，同埋去全聚德食北京填鴨。不過佢就好贊成港府提出政制發展，須符合已故《基本法》草委會主任姬鵬飛，必須兼顧社會各階層利益嘅講法。
哥頓話，𠵱家睇嚟○七年直選特首無望，但就應該利用今後三年研究未來政制模式，佢話好擔心如果𠵱家直選，會選咗長毛梁國雄出嚟。長毛成日着住嗰件印住捷古華拉嘅T恤，哥頓話捷古華拉就係嗰啲惟恐天下不亂嘅人，周圍搞革命，搞到原本同佢係戰友嘅古巴總統卡斯特羅都唔妥佢，叫佢去波利維亞搞革命，點知就俾人革咗佢條命。哥頓話如果立法會選出三十一個呢種人，商界會好怕。哥頓話嚟緊呢屆特首，可以考慮擴大選舉團人數，增加代表性。
（圖）哥頓話，嚟緊三年應該用來研究未來政制模式。
傳真︰2623-9278
電郵︰