大市繼續調整，恒指收市跌71點，成交縮到200億元，但上升股（不計認股證）324隻，又多過下跌股319隻，趁低吸納者眾，投資者信心未有受集資潮所影響，芬佬就繼續做好友，佢哋話呢幾日嗰市調整係好現象，亦係低吸優質股的大好機會，過咗農曆新年假期，個市又會起到你唔信，主流仍然係國企股。
滙豐（005）壓力未除，跌1元，中移動（941）較強，逆流而上，長和系急升1日後，跟市調整，但中期升勢未完。周二推介的太A（019），果然開車，高收54元，升3.3%，大行收集一完成，就有好戲上演，短線目標係58元。
另一隻要留意嘅係大酒店（045），在5元樓上整固，造緊三角形，一破位而上，起碼可見6元，有大行最近出報告，目標價係6.8元。
人民幣今年升值機會大，基金睇好中國資產，紛紛增持地產股，升得最急係首創置業（2868），收2.7元，升10.2%；其他如越秀投資（123）升4.4%，北辰（588）同華潤置地（1109）亦進帳3.4%同3%。
越投成交最勁，呢隻係基金一路買住嘅股票，收集咗成3個月，噚日升破下降軌，突破大型上升三角形並完成後抽整固，照度上去，上升目標指向1.3元。
越投重組完成，已變身大型地產股，手上持有的土儲，可供興建樓面面積7300萬方呎，足供未來10年發展之用，由於採用審慎會計政策，將資產淨值83.5億元的項目以45.4億元入帳，變相地價較市價低40%，售樓利潤相對亦較高。
公司目前發展中樓面約1500萬方呎，大部份屬中高檔項目，將於3年內落成，即未來每年可供銷售面積約500萬方呎，遠比去年約270萬方呎為多，以現時的樓價計，每年可套現約26億至30億元，盈利將進入高增長期。
去年的中期報告，越投的每股資產淨值1.12元，但若以注資的資產淨值全數入帳，並經發行新股調整，則每股資產淨值為1.74元，現價折讓45.4%，頗為吸引。里昂報告指內地通脹或重燃，有利樓價上升，故給予越投買入評級，估計今年底的目標價為1.31元。
郭兆誠