儲蓄存款利率低到零點零零一厘，一萬元儲蓄一年得番一蚊。不過對有錢人士嚟講，仍有方法賺高息，風險當然高啲啦。
富翁V有私人銀行家（privatebanker）幫手，日日報價，近幾個月猛咁收高息。佢以前做金融出身，對認沽、認購等期權工具，非常熟悉，私人銀行家唔敢向佢吹牛。呢日富翁V向左丁山講：「嗱，我逼上梁山，唔敢買美股，亦唔敢買港股，因為驚住反彈過急，位高勢危，於是買外幣存款收三四厘息，但三四厘都係低啫，於是首先存入英鎊收息，然後同時sellcall又sellput（sellcall即沽售認購期權，睇跌就sellcall；sellput即沽售認沽期權，睇升就sellput。）外滙價、利息、期權價，間間銀行都唔同，我嗰間就往來好耐，費事我周圍格價咯。上個月就咁樣收高息，以年率計，高達二十厘。」
熟行情就夠膽做啫，冇私人銀行家報價，資訊唔多靈通，未必容易賺錢，總之只要係賺咗第一個一千萬之後，就比較容易賺高息，錢賺錢，我哋冇得恨，只能夠眼光光。不過好多銀行嘅理財戶口都搶生意，有錢師奶就係最佳客戶，現在銀行靠貸款息差賺錢，蛇都死啦，邊度會有growth，根本就係一間金融產品零售市場，所以財資部（treasury）嘅產品設計，風險控制人員比較吃香。富翁V非一般師奶，適逢美元呈大弱勢，存外幣兼sellput，食正大浪，故此佢對股市大升，毫無興趣。