中原東涌分行嘅梁善球，攞到03年最多單數獎，一年促成一百一十三宗成交，平均三日就做成一宗，但都係細價樓嚟。
佢噚日暢談心得時，聽落真係「有血有淚」。佢話第一宗成交因有同行爭奪，最後搞到冇佣收；雖然買家有介紹客人畀佢，做成咗只係收到四成佣，好過冇。跟住個客又介紹朋友畀佢，睇樓時買家個LV袋爛咗，又主動賠番畀佢。最後呢班手袋黨再介紹兩名租客畀佢。梁善球回首呢啲經歷，覺得好「屈辱」。事後董事總經理黃偉雄就勉勵佢話，呢啲可鍛煉佢嘅「量度」，係邁向成功其中一步。
佢上司助理區經林少禮話，梁善球搵錢心態好強，又勤力，有時假都唔放。梁善球促成嘅交易，一手買賣佔六成，主要係東涌東堤、海堤同藍天海岸一手單位；舊年十二月重做到四五單一手，營業額有成二十萬。
市況好轉，不時傳出業主賠定再賣嘅消息，買家唔想遇到呢啲情況，梗係要諗辦法保障自己啦！啱啱以一千二百萬賣出嘅長沙灣柏裕工業中心地舖，買家豪氣落定一百二十萬，難怪簽約前再有買家出價一千二百五十萬洽購，業主仍堅守承諾，賣畀佢。
據梁志輝話一般情況下，買家第一次落定都只係幾萬蚊，但呢名買家就畀一成，擺明志在必得。
個地舖四千三百呎，連一個貨櫃車位、兩個貨車位。
自從運輸署減少批出邨巴申請後，發展商就轉為申請公共車輛線路，畀所屬樓盤住客使用之餘，亦方便公眾。何文田豪宅君頤峰，最近就獲批出一條小巴專線，循環行走至屋苑，但發展商就未決定會選擇行經佐敦定尖沙嘴。雖然話係豪宅，唔少住客都會揸私家車，但多個選擇，點都方便啲。
今年頭炮新盤荃灣朗逸峰二期，噚日長實開放示範單位畀傳媒同代理睇。發展商極力催谷嘅相連單位「豪門大宅」，近三千呎，可以話係眾盤最大嘅示範單位。售樓處有四個示範單位，淨係個相連戶就花費二百八十萬裝修。長實黃思聰好有信心話，呢個係今年必睇嘅示範單位。
單位其中一房，改裝成健身房，四百幾呎嘅主人房，套廁以半透明玻璃相隔，若隱若現，重安排女模供拍照。
馬灣珀麗灣三期準備農曆新年之後發售，承接去年一、二期嘅情況，代理爭住開記者會。噚日就先由美聯搞咗個珀麗灣保齡球賽，新地雷霆照例畀面出席。
美聯同發展商代表都有組隊參賽，美聯就由新界區幾位董事親自落場，荃葵深井區嘅董事黎偉強出名係高手，有姿勢有實際，結果不負眾望，奪得冠軍。雖然未輪到珀麗灣三期嘅銷售大獎，不過點都可以攞到頭威。
蘭西
電郵地址：
