施夫高域真係一世夠運，啱啱同樸茨茅夫解約，轉個頭就簽咗史特加，嚟緊喺二月尾重有份踢歐冠盃㖭。
施夫高域九七年夏天開始喺德甲搵食，效力利華古遜，發展亦好順利；前年佢幫隊波攞咗三個亞軍（德甲聯、德國盃同歐冠盃），去夏雖被放棄，但好快就落到班加盟樸茨茅夫。
儘管佢喺老樸打得唔錯，重做埋主力，惟佢就話同會方喺合作上有問題，結果喺禮拜二解約；點知轉個頭，佢簽咗史特加，返德甲比賽之餘，重再有機會踢歐冠盃㖭。
但有人話佢早就同史特加斟掂數，𠵱家佢同老樸解約，就幫史特加慳咗筆轉會費。唔怪得老樸領隊哈利列納好寸咁話：「我早知佢係個爛蘋果，所以佢離隊冇人會覺得難過。」
馬賽教頭丟埋烏紗
馬賽上屆喺教練佩連帶領下，聯賽排第三之餘，重攞埋歐冠盃參加資格。去夏佢哋簽咗美度同基斯坦華後，頭段打得唔錯，但自從話想借巴夫斯後，就愈打愈差；而佢哋喺借得巴夫斯後，演出仍冇改善，𠵱家排第六，連佩連都畀會方炒埋。睇嚟巴夫斯係佩連剋星。
曼聯高層要管教吓
曼聯兩名青年軍球員馬殊同費拿瑾喺前日發生交通意外，前者重傷得好嚴重，所以佢哋對伯明翰場預備組賽事亦被迫改期。記得喺五個月前，佢哋嘅年輕球員占美戴維斯就因交通意外而送命，雖然意外嘅嘢好難避，但撞車好多時都因超速所致，曼聯班高層應好好管吓班𡃁仔。
奧高查寧留英𢱑銀
保頓主將奧高查做開存款嘅銀行可能倒閉，聽講佢畢生積蓄都喺晒入面，隨時一無所有。奧高查擔心之餘，亦暗示唔排除放棄踢非洲盃，寧留喺球會踢多兩場攞獎金。咁又係嘅，係人都知尼日利亞國家隊窮到成日拖欠球員獎金，呢次真係夾喺榮譽與金錢之間嘅人生抉擇囉！