政務司司長曾蔭權舊年年尾主理「西九龍文娛藝術區計劃」，大發官威，結果嚇窒反對嘅中小型地產商。
煲呔諗嘢果然轉數快，話諮詢各界對西九龍項目嘅意見時，要問埋中學生，因為多年後項目完成，我哋嘅下一代先係西九龍項目嘅用家。話咁快，煲呔已經約咗一班中學生下個星期會面。
當奴呢一個伏筆落得好靚！佢接手做埋政制發展三人小組，會唔會順便問埋呢班「未來用家」點睇香港民主進程？因為八方聽聞，煲呔可能覺得西九龍嘅項目諸事順利，有意照辦煮碗咁做政改諮詢。
咁照佢之前講嘅邏輯，加上左派成日想普選有咁遲得咁遲，拖慢嚟做嘅話可以諮詢晒全港中學生，甚至小學生、幼稚園生！煲呔如果搵「真正用家」諮詢，又可以諗諗搵啲大肚婆，等佢十月懷胎、再生埋、再養大到十六歲，先問啲「未來主人翁」嘅睇法。咁搞落去，𠵱家聽住北大人口口聲聲講民主要「循序漸進、按部就班」嘅細路、青年，分分鐘等到頭髮都白、中國太空人登陸埋冥王星，都未等到普選特首啦。
傳真︰2623-9278
電郵︰