除咗「年老」嘅尊尼事務所藝人，例如少年隊或SMAP之外，近五、六年上位嘅尊尼仔，私生活都好開放，之前影落嘅親熱、豪情甚至荒淫相成日俾人登咗出嚟，次次都嚇到我羅拉啋啋聲。可能我真係見識少，最近有個網民就將V6成員森田剛八年幾前同女友拍下嘅不文相擺上網，嚇到我要即時close咗個網，啋，大吉利是咩！
後來經我查證，原來呢輯相六年前已經俾狗仔隊雜誌《Friday》登過，不過可能當時森田重未紅，所以唔係好轟動。而佢手上揸住嘅，聽講只係性商店買嘅糖嚟啫，如果唔係照計佢晨早已經俾尊尼事務所炒咗。
據雜誌所講，當時森田只係幫SMAP伴舞，佢視木村拓哉為偶像，連食煙手勢都學到足。而森田當時亦同大佢四年嘅女友過住半同居嘅生活，兩個人曾經好恩愛，情到濃時，再激嘅相都影得出啦！講真森田唔係第一次俾人登呢類相出嚟，再加埋佢幾年前俾人告強姦嗰單官非，難怪近年佢要同上戶彩呢類咁純嘅女仔一齊，洗洗個底啦！