恒指跌76點，主因滙豐（005）有鬼子佬唱淡而回落拖低，滙豐收124元，跌2元。
不過滙豐Put輪冇一件打入龍虎榜，龍虎榜俾李家Call輪幾乎霸晒。長實（001）又升2.5元，和黃（013）亦有進帳1.5元。兩隻大藍籌如果再升多啲，9RSI好快逼近90，到咗超買地步，𠵱家先至追買長和Call輪，風險好大。不過趁低買啲Put輪，亦唔着數，一來驚住相關正股超買之後再超買，而Put輪溢價一般都唔細，揸落驚輸「收水」（溢價收縮）。博長和系今年跑贏大市，等回吐先至諗吓啲Call輪。
滙豐跌，滙豐Put輪升啲，但唔值得追捧。Put輪溢價過高，最低嘅係9400，輪價昨日亦只係升得4.6%，收1.36元，冇乜成交，以輪論輪，6月到期，溢價6.1%，槓桿率9.1倍，正過晒其他Put輪，其他Put輪，溢價至少都12%。就算睇淡正股，都咪手多。反而滙豐若再跌2元，可諗吓趁低買Call輪，對象有9157與9136。
中銀（2388）做「披成」後最高見15.40元，昨日回到14.50元，可以趁低諗吓Call輪，唔想冒大風險揀正路對象，可以揀9218、9169，兩隻輪溢價相對較低。
章 盛