經濟好番，中原黃培權話，市民買賀年糖果比以往出手更闊綽，有做開糖果零售批發嘅商家，索性以日租形式喺新界核心區租舖，租期由兩個禮拜至一個月不等。
大圍、荃灣都出現賀年糖果店日租個案，其中大圍富嘉花園二十三號地舖，每日租金一千八百蚊，間舖二百四十七呎，租期至年三十晚；荃灣川龍街海天豪苑地下三號舖，七百四十四呎，日租都要一千蚊。
至於平啲嘅荃灣荃興徑十至十八號地下六號舖，四百呎，每日租金九百，同區禾笛街三十三號地下D2號三百呎舖位，日租都要七百蚊。
據黃培權講，呢批零售商揀舖，最緊要人流量集中，大圍間舖喺正火車站側跟，而川龍街嗰間隔籬係街市，兩舖都係人流滙聚點，租金即使貴啲，只要租客去貨速度夠快，埋單計數應該可以過肥年。
歌星楊千嬅好有機會成為首位入住赤柱富豪海灣嘅業主。發展商透露，富豪海灣業主最快會喺今個月中搬入嚟住，嗰個就係楊千嬅嘞。佢去年十二月初以三千三百萬買入C型屋，比頭一批買家遲咗差唔多3個月入市，不過佢喺一個月之內搞掂所有手續，正式交樓之後就即刻大裝修。聽講富豪海灣到𠵱家賣咗接近五十間，只有兩、三間正式交樓，最早開始裝修嘅就係楊千嬅嗰間。
樓市交投熾熱，又多番人關心樓市。農曆年近，銅鑼灣一代理行櫥窗除貼滿放盤紙外，為應節重貼上手拿「猴年好運」揮春嘅猴子裝飾，果然夠「引人注目」，連路過嘅交通警都不禁駐足觀望，唔知佢跟住有冇睇吓啲放盤，諗吓買番間呢？
華懋集團嘅129淺水灣，由豪宅級物業搖身一變成為酒店，憑佢咁突出嘅外貌，勢必成為區內地標。噚日售樓部經理吳崇武就主動提到呢間頂級酒店，有三百幾間房，最細嗰間都有一千一百幾呎，最大成二千幾呎。重話主席龔如心有機會親自介紹。
另外，華懋𠵱家最多貨量嘅沙田碧濤花園，吳崇武引述風水師話，個樓盤今年行正八運，銷量會好，所以全力催谷咁話。
蘭西
電郵地址：