張栢芝前晚穿上一件鑲滿水晶、價值逾六萬元的名貴上衣，出席電影《鬼馬狂想曲》首映。一身閃令令的栢芝搶盡同台的Twins風頭，當她穿越人群時，因險些勾爛衣服，嚇得當場大叫救命。
張栢芝與胞弟張豪龍、陳小春、古天樂、劉青雲、Twins及吳鎮宇等，前晚在銅鑼灣出席電影《鬼馬狂想曲》首映。栢芝穿上鑲滿Swarovski水晶、Moiselle贊助價值逾六萬元的勾花上衣赴會，搶盡風頭。
栢芝上台時，所有在台上的藝人不期然向她投以注目禮，其緋聞男友陳小春也有昅實栢芝，而栢芝則自豪地說：「成六萬幾蚊，貴係因為釘晒石，我要好小心，勾甩咗要賠番畀人哋，我細佬（豪龍）重話，家姐你呢六萬幾蚊擺落我銀包好過。」
由於栢芝不時在人群中穿插，當她經過記者群時，其靚衫險些勾在記者的背囊上，栢芝即緊張地大叫：「睇住我件衫呀，救命！救命！好驚！好驚呀！」
栢芝又表示在春節期間會與陳小春同往拉斯維加斯登台，完騷後她會馬上返港，因她在本月二十五日復牌，栢芝說：「我好想快啲攞番個牌，攞到個牌之後，我會第一時間揸車上山頂。冇車牌嘅日子，令我好似跛咗咁。」
對於有報道指栢芝因情緒不穩而未獲唱片公司斟約，故她會續約環球，栢芝即表示大家可睜大眼看有沒有人簽她，而她根本未跟環球傾續約。
此外，劉青雲在《鬼》片中演許冠文一角，前晚見其言行亦甚似許冠文，他坦承仍未能抹去對方的影子，吳鎮宇被記者問及此事時，他暗寸青雲說：「呢啲咪好演員囉，甩唔到角色。」
而組合Twins成員鍾欣桐在年初六將夥謝霆鋒拍攝《新紮師兄》電影版，她飾演當年張曼玉的穎芝一角。
採訪：魯萍
攝影：林德雄
