【本報訊】年近歲晚，家家戶戶忙於為家居清潔扮靚。但掃地、抹窗等看似簡單的家務，原來危機處處，隨時有機會拉傷肌肉，導致關節突出、坐骨神經痛或腳部麻痹。物理治療師更指出，中國人傳統上不喜歡在「正月」求醫，結果令病情惡化，若自行使用電動按摩器，更有機會燙傷皮膚。 記者：張嘉雯
物理治療師鄭泳珊解釋，有些市民所用的掃帚太短，要彎腰遷就，令腰骨負荷過重，「有啲人一掃就掃好耐，想睇清楚係咪重有塵，於是（腰骨）愈彎愈低。如果長期係咁有可能令椎間盤內嘅軟組織拉長。」
曾在公立醫院工作、現已私人執業的鄭泳珊說，其中五名向她求診的病人中，有兩至三人是因做家務引發痛傷，「都見過有啲（病人）捱到過年之後，過晒正月先睇醫生，令病情嚴重咗。」
除了掃地，抹窗同樣高危，「啲人抹窗會『岳』高頭，頭部成日向後，一抹就抹好耐，用布抹完再用報紙抹，萬一突然間有人嗌佢，一擰個頭就會拉傷。」不少市民都喜歡在新年前添置新家具，少不免要搬重物，「最常見係件嘢（貨物）唔喺前面，側身由一邊搬去另一邊，好易整親條腰。」
「有啲人覺得肌肉『梗梗地』，以為冇乜嘢，但其實已經係受傷嘅訊息。」鄭泳珊稱，錯誤的動作隨時令筋腱發炎，甚至坐骨神經痛，令下半身活動受影響；而椎間盤在長期受壓下也可能會移位，「有啲病人可能要長期休息，腰背痛得好犀利，一郁就會增加痛楚。」
她提醒市民在掃地時使用長柄掃帚，盡量挺直腰背，拖地時使用能夠扭水的桶；抹窗時身體要與玻璃保持一定距離，踏上小椅或梯子上，令要清潔的地方保持與視線水平的位置，「頭唔好岳咁耐，因為頭嘅重量佔好大比例。」她又建議，搬重物時用手推車，但「要推，拉都唔好，因為好易拉傷手。」
她指出，市面的電動按摩器未必適合作治療之用，冰敷及熱敷更簡單有效（見表），「電波嘅強度要好考究，好多人唔識用，覺得力度愈來愈弱，（強度）加大啲加大啲，好容易燙傷皮膚，有啲人甚至（把按摩器）放響骨嗰度，骨嘅皮膚好薄，好多神經線，好易刺激到神經細胞。」