法資證券行里昂證券每年都會喺過年前，發表新一年嘅風水指數預測，除咗講佢點睇股市走勢，亦順帶揀幾個名人批吓命。噚日佢哋公布猴年風水指數，就講吓屬牛嘅董特首，預測佢來年會鴻運當頭，桃花旺，尤其有女性緣，因為佢會喺年初重新委任陳方安生出任行政會議召集人。
風水師重話，陳太上任後即推行減免入口高消費品嘅稅項，包括佢啲名牌手袋，於是世界各大名牌紛紛湧來開舖，令商舖租金上升三成，跟住陳太又會更換代表香港嘅飛龍標誌，換成自己招牌嘅「陳四萬笑容」，出售呢啲襟針為香港庫房帶來十億元收入。
經過舊年區議會受挫嘅民建聯變咗做反對黨，但里昂估佢哋九月立法會選舉會全軍覆沒，立法會三十個直選席位全部由民主派奪得。
里昂又開美國總統喬治布殊嘅玩笑，預測屬狗嘅小布殊將成功連任，並活捉死對頭拉登，為咗避免佢嘅手下會挾持人質嚟換取釋放拉登，布殊下令對拉登進行變性手術，跟手放佢番阿富汗，等佢以後要戴住頭紗度過餘生。
上述預言認真天方夜譚，信不信由你。
傳真︰2623-9278
電郵︰