噚日詩姐姐同李柱銘、余若薇、吳靄儀等法律界立法會議員食晏，個個出到嚟都話，詩姐呢次態度好開放，擺到明係聽意見為主，馬丁同八方傾開，佢反而為政務司司長曾蔭權擔心。
自從煲呔曾被委以政制專責小組最高負責人之後，大家都怕佢做咗第二個葉劉。識佢嘅人第一時間反駁話一定唔會，因為煲呔見慣大場面，兼就快到花甲之齡，一定會小心行事。
今次民主黨亦唔敢輕舉妄動，以免搞僵咗冇彎轉。八方問馬丁，最近有冇喺教堂撞到煲呔反映意見，點知馬丁話，佢澄碧閣間屋要裝修，搬咗去司徒拔道暫住，去少咗花園道間天主教堂，所以少見咗煲呔。有人話呢鋪要睇吓煲呔嘅政治智慧有幾高，但馬丁唔係好認同，佢話北京要人聽話，政改問題上由中央主導，佢都擔心煲呔到時會腳軟，唔知頂唔頂得住。
傳真︰2623-9278
電郵︰