上季韋斯咸降班，好多球迷都惋惜，畢竟都喺英超睇咗佢哋咁耐。我求大俠當初都同大部份球迷一樣，等緊佢哋憑陣中球星實力，可以喺來季回升英超；可惜𠵱家呢隊韋斯咸已人面全非，目前喺甲組成績重唔係咁樂觀，希望唔好一沉不起啦！
啱啱連門將占士都過檔曼城，韋斯咸當日陣中一眾球星，只係剩番迪科及卡域克；前者近期頻頻攞紅牌，又係一副博離隊格局；季中換上領隊柏杜後，似乎重衰過以前，𠵱家只係排第八位，升班附加賽資格都未必穩陣。我求大俠𠵱家都唔敢奢望佢哋來季回升，唔好繼續沉淪到要再降班就夠嘞！
四年前迫阿仙奴畀佢過檔皇馬嘅法國前鋒安歷卡，話加盟大球會嘅機會唔係時時有，叫沙夏一定離開富咸轉投曼聯。有人認為安歷卡志在煽風點火，但我求大俠收到風，原來佢同沙夏細個一齊踢法國青年隊，且喺法國足球學校做過三年同學，照咁睇，佢應該係出於一片好心。
咪以為踢車路士好風光，其實不知幾慘，好似祖高爾就俾人當人球掟嚟掟去。早前車仔想將佢借去俄國，但佢死都唔制；而車仔日前又重提舊事，諗住用佢換查爾頓嘅柏加，點知對方唔肯先唔成事。話晒祖高爾被認為係英格蘭未來之星，既然唔得車仔重用同尊重，不如走好過。
「野獸」艾蒙度加盟富明尼斯，將會同羅馬里奧再做隊友。佢哋當年喺華斯高經常發生衝突––互數不是、爭射十二碼，連入球都唔一齊慶祝。呢次故劍重逢，羅馬里奧就話大家都老囉，一定收晒火。即管睇吓兩個加埋成七十歲嘅老鬼，會唔會令巴西聯賽從此多事嘞。
唔知波迷重記唔記得法迪加？呢位加盟國米後就被驗出心律不正嘅仁兄，近日返到意大利覆診，據講佢兩個月內就可以比賽。佢本來被安排着十號球衣，近年着親呢個冧巴嘅國米人的確唔多順景，家吓教練已經唔係佢來投時嘅古柏，唔知響沙哲朗尼麾下，佢重有冇前途呢？