上星期六馬場係方嘉柏天下，呢位新紮師兄居然一日之內，跑十場馬，佢個馬房贏咗五場頭馬，一場位置，成為十年來一日最威風嘅練馬師。記者估計，五場頭馬連環過關嘅話，十蚊贏三百萬，相信方嘉柏都估唔到自己嘅馬可以連場爆冷，贏足五場也。
第八場贏嘅馬係「寶威武」，五十倍，獨贏投注額只有三十一萬。拉頭馬嗰陣，一位仙風道骨嘅道士現身，全場哄動，好多人話：「唔通道長作法，『寶威武』竟然可以跑贏『飛鷹』、『色種好』？」道長身旁有一位打扮樸素嘅女士，冇人知道佢係邊個。次日睇《成報》先知道呢位女士來頭好猛，就係共青團中央辦公室主任夏朝霞。嘩！胡錦濤嘅「團派」現在走紅中國政壇，「寶威武」馬主孫少文不知何許人也，竟然有面請到共青團要人以及大大有名嘅道長朱鶴亭親臨沙田捧場，成為馬主嘅兩大護法，抵馬主爆大冷贏馬。
大記者撲埋去訪問朱鶴亭，點知自己唔識上海話，普通話也不靈光，冇法子溝通，痛失機會。朱先生老到不知年，別號「玄鶴子」，以中醫藥出晒名，亦寫過好多本書關於紫微斗數，子平術數嘅書，左丁山買過幾本，佩服到不得了。佢以前好少喺馬場露面嘅，今次拉頭馬，成為全場焦點，大記者限於語言，冇法子請佢講幾句指點猴年迷津，豈止佢走寶，左丁山亦覺好嘥啫。