滙豐高層對集團企業文化嘅效忠，一向為外界美談，新任總裁邵銘高（MichaelSmith）重可以話係箇中佼佼者，尤其係佢試過大髀中槍，翌日做完手術後即返工亮相，穩定軍心。
邵翁噚日同八方食飯，講到佢喺九七至○二年間派駐阿根廷滙豐銀行時嘅精采故事。當時，佢出掌行政總裁及主席一職，時值阿國金融風暴引發政治動盪，腥風血雨下，外資行成為暴民侵擊目標，史密夫亦因為賓架身份被列於暗殺名單內。雖然行方已為佢請咗一隊貼身保鑣，但百密也有一疏，○○年一個晚上，佢離開銀行時俾八名殺手狙擊，估唔到身形發福嘅邵銘高，腦袋身手如斯敏捷，電光石火間揸車衝出重圍，可惜最後大腿仍然中槍，幸得一名好心司機送佢去醫院。
第二朝，佢打電話畀當時嘅滙控行政總裁韋志誠，報告腿傷，韋翁亦相當幽默，第三個問題已問佢幾時可以返工。
邵銘高話，若果將自己切開一半，內置嘅都是滙豐DNA，重話老婆要佢轉工，就寧換愛妻亦不轉工。嘩，八方覺得真係勁過流香港血嘅煲呔曾。
傳真︰2623-9278
電郵︰