喺今屆北美國際車展上，凌志（Lexus）除於會場上展出全新GS系列房跑車外，同場更展出一款以環保概念行先嘅RX400h，同樣惹來不少車迷注視㗎！
呢款全新RX400h環保SUV，係採用上Hybrid混合動力系統作配搭，並以一台3.3公升V6偈作核心，輔以車上嘅電馬達，合共能為其提供高達約270匹嘅馬力，匹配一套全新ECVT自動波，行車表現順滑流暢之餘，重可以有低廢氣排放及低耗油量嘅優點，從而達致環保嘅效果。除此之外，呢部全新RX400h更加入有最新嘅VehicleDynamicManagement系統，從而令行車變得更安全呢！
至於呢部全新RX400h環保SUV嘅外觀及車廂鋪排，則與現行於當地發售嘅RX330型號相近，同樣來得獨特吸引之餘，乘坐舒適愜意感亦甚高，就連車廂設備配搭，又見齊全易用㖭！未知身處香港嘅車迷，有無機會與之見面呢？