當奴宣布,收到中方指示,將會喺農曆新年之後,御召上北京,表達中方對政制改革嘅「原則」同「立場」。
當奴今次身入虎穴,只許成功,不許失敗。佢應該記住,呢一鋪,唔係佢曾氏家族嘅榮辱,而係關乎全港六百萬人包括地產商、投資者利益存亡嘅歷史性訪問。其份量,不下於二百年前英皇特使馬爾嘎尼勳爵進見乾隆皇,只肯跪低一隻腳嘅千秋佳話。
今次大陸係有心考當奴牌。二○○七直選特首,胡溫逐漸表露真面目,即是「冇得傾」。但普選特首,唔止得一種方式。雖然唔可以六百萬人一人一票,好似台灣佬揀連戰陳水扁咁,大道唔通,重有小路包抄,彌敦道封咗咩?由尖沙嘴去佐敦,都重可以運路行麼地道、寶勒巷、屈上漆咸道向北,行上肥佬黎以前住開嘅覺士道,向左再屈一屈,咁咪一樣去得到佐敦?
例如:八百人選舉團,可唔可以由全民選或功能組別產生?如果唔得,六百個得唔得?如果○七年不准直選特首,咁○八年可唔可以用擴大立法會直選議席嚟交換?
冇錯,生殺大權,喺胡溫同四大護法之手,但香港人手上,亦唔係冇本錢──今年九月嘅立法會直選,就係香港人可以同北京講數嘅籌碼。一定要兩邊傾、妥協,都唔可以淨係港方投晒降,中方亦要讓步!
有啲土共會大罵:乜話,咁咪即是「搞對抗」?如果提出建議,磋商謀求妥協都叫做對抗,咁就不如唔好搞「一國兩制」。
當奴今次北上,唔可以淨係聽口令,叫佢除面衫,佢就主動連底褲都剝埋,光脫脫咁走返落嚟,一定要做一個勇敢的中國人,面告胡溫或其馬仔:我除一件面衫,你都要除番一件。
大陸如果完全唔肯退讓,就唔會叫當奴上去,叫得佢上去,即是重有數講。
當奴如果處理得當,面向大陸,考牌成功,面對港人,亦成功「扒時」,就有可能撈下一屆特首,或者阿董到九月,就被勒令「生病」,提早埋單,當奴上台懾住,唔俾何鴻燊公然表示若然某人上台佢就抽資金走人嘅嗰位仁兄上位(如果嗰個人上台,唔止全港五十萬人遊行,簡直有五十萬隻木船投奔怒海都似),咁就可以拯萬民於水火。
吾爾開希嚟香港,大陸都冇反對,呢位肥哥哥通緝令有效期今年屆滿,即是話佢將會可以返大陸。除咗土共、鄔維庸等人嘅頭腦唔變之外,世事總係會變嘅。當奴北上,鱷魚釗南下,兩者都責任重大,鱷魚釗就冇癮回鄉嘞,咁當奴呢?
傳真︰2623-9278
電郵︰