港股噚日仍受「披成」傳聞困擾，涉及的股份係中石化（386）同一隻民企，不過，收市後仍未有動作。至於中石化，受傳聞影響，股價繼續走軟，而做完披成的中石油（857）則逆流而上。
恒指收13320，跌75點，成交229億元，期指轉低水20點，大市在高位整固，表現都幾反覆，好似前日，大市上升，但下跌股（不計認股證）443隻，遠超出上升股的235隻，但噚日跌市，下跌股281隻，而上升股反而有347隻，個別發展愈來愈明顯，亦反映投資者有信心趁低吸納。
兩大藍籌滙豐（005）同中移動（941）受壓，但地產股大強勢，長和系全線上升，似醞釀大動作，為和黃（013）即將推出的3G造勢。講到3G，呢輪電訊股上晒力，繼Sunday（866）之後，又輪到數碼通（315）發威，噚日高收9.35元，升6.8%，有利條件係3G的投資額低於原本預算的15億元，而與亞洲區同業比較，其股價亦相對便宜，大行報告預測其目標價可見11元至13元。數碼通近3個月走勢形成大圓底，噚日破位而上，照度上去，短期目標係10.5元。
地產股中，香港興業（480）走勢亦呈現突破，高收3.075元，以大圓底形態的量度升幅衡量，目標指向3.6元。興業每股資產值4.86元，即使以3.6元計，仍折讓26%！
樓市復甦，對興業好有利。第一，公司現有約330萬方呎樓面的土地儲備，足夠未來4至5年發展，而迪士尼樂園明年落成，物業升值更快。第二，早前公司為東涌藍天海岸撥備，現時售價比預期上升頗多，回撥機會甚大。另外，股市大升，集團的證券投資亦可獲厚利。
早輪推介隻紫金（2899），跌咗，但在呢輪上市嘅H股中，最靚又係佢，高收5.8元，升番8.4%。有大行噚日午後急電，推介買入，話短線目標係7元，現水平追入，仍可賺20%！講番呢幾日震倉，貨源應該更為歸邊，大戶心目中個價，仍然係9至12元。
另一隻呢輪好強勢嘅中信資源（1205），聽聞短期內會有大動作，早前王軍話過，時機成熟時就會注入鋁廠，莫非同此有關？中信資源喺1.5元至1.6元間整固，成交明顯增加，可留意。
郭兆誠