王菲一向對玄學嘅嘢都深信不疑，佢除咗搵玄學家蘇民峰幫佢排解疑難外，平日又鍾意戴住舊愛謝霆鋒阿媽狄波拉送畀佢嘅紅色愛情繩，雖然呢條繩唔能夠保佑王菲同霆鋒甜甜蜜蜜，但踏入新一年，王菲為咗佢未來嘅事業與愛情，亦決定遵從一位密宗大師嘅建議，離開香港，去外地兜個圈避年，直到下個月五號先至返香港。
王菲同謝霆鋒愛得欲斷難斷，用情甚深嘅王菲同愛郎成日又分又合，都咪話唔傷，而且舊年王菲喺事業上又冇乜突破。
馮仁昭知道王菲早排曾經見過一位密宗高人，對方提議佢喺今個月內一定要離開香港，去外地避年，到下個月五號之後至可以返嚟，咁就會有助佢擋晒啲是非小人，愛情同事業嘅發展亦都會較為順利。
王菲聽完之後，又真係好聽話，馬上坐言起行，日前佢已經帶埋愛女竇靖童返北京過年，之後佢就可能繼續留喺北京或者飛去上海度假，唞夠至返香港衝刺。希望佢出埠「行完大運」之後，真係可以順風順水啦！
新城娛樂台喺日前公布《十大勁爆娛樂新聞》，同聽眾回顧十單娛樂喜事，當中包括梁詠琪、郭富城榮獲○三年傑青，同埋「左麟右李演唱會」○三唱到○四場場爆滿呢兩單喜事，○三年嘅娛樂圈經歷咗一單接一單令人傷感嘅新聞，呢個喜事回顧都總算可以沖喜吓嘅！
蕭亞軒早前推出全新專輯，由於今次合作班底以前經常同孫燕姿拍檔，初期蕭亞軒十分擔心會被塑造到翻版孫燕姿一樣，所以佢一直堅持要保持自我，唔好失去風格，但最終佢都好滿意自己所錄嘅歌曲，完全冇人哋嘅影子，可以維持自我。其實使乜咁驚呀，反正孫燕姿都話要休息成年，風格相似都冇人知啦！
早前曾經同日本組合SMAP合作演出《紅白》嘅內地女子組合「女子十二樂坊」，佢哋早前推出嘅最新專輯《BeautifulEnergy》喺日本銷量已經衝破二百萬張，就連日本首相小泉純一郎亦喺新春當日買咗隻碟返去聽。
洲立集團負責人黎筱娉表示，舊年購入廸士尼動畫《海底奇兵》嘅票房唔錯，今年農曆新年佢哋買咗廸士尼動畫《熊之歷險》，重打算用三百萬做宣傳，希望再有好嘅成績。下月又會上映由金像影后妮歌潔曼主演、榮獲金球獎八項提名嘅新片《亂世情天》，真係猛片接踵而來。
劉德華同加際娛樂嘅糾紛睇怕都有排煩，近日有份製作華仔國語唱片《大人的情歌》嘅台灣大耳牛製作公司總經理李安修，正向加際追討欠款，製作費一早簽咗係四百萬港幣，而加際只係畀咗大耳牛一百萬港元做定金，𠵱家大耳牛要追尾數，李安修噚日重話已交畀律師處理。
