陳小春前晚出席香港時裝節開幕酒會，早前他領取「十大傑出衣着」獎項時大出風頭，但前晚小春表示當日其實不開心，因場內有不少人向他投以「白鴿眼」，他說：「估唔到香港有咁多白鴿，個個着名牌好似鬥有錢。」
由香港貿易發展局主辦的香港時裝節前日開鑼，前晚假會展舉行一場名為「香港時裝精選——深海世界」的時裝表演，出席欣賞的名人和藝人不乏本屆「十大傑出衣着人士」得獎人如吳鎮宇、陳小春及傅明憲等。
陳小春早前領取「傑出衣着」獎項時，以一身包到實的hiphop迷彩服赴會，大為搶鏡，但前晚他卻自爆領獎當日並不開心，他說：「嗰日個場好多『白鴿』飛嚟飛去，我同我助手都聽到有人對我嘅打扮『jeepjeep』聲。」
小春續說：「我嗰日嘅打扮其實花咗好多心思，每個人都可以有自己嘅着衫風格，我唔覺得自己嗰日着得失禮噃。真係估唔到香港有咁多白鴿，個個着名牌着靚西裝，即係鬥有錢啫，貧富懸殊好犀利。」
而當日有份奪獎的傅明憲，前晚對小春一番話也力撐說：「我覺得小春着出咗hiphop衫嘅style，如果佢着禮服可能冇咗份明星風釆㖭，我覺得小春係實至名歸嘅。」
另外，章小蕙前晚偕同設計師好友LuisaBeccari母女出席，她宣布其已結業的時裝店在這一兩天會重開，所有貨品以二折以下清貨價發售。
採訪：顏英儀 攝影：陳志嵐
