早排經紀黃嫌股價太高的北泰（2339），出完業績後沉寂咗一輪，近日股價又再異動。小初問經紀黃，隻股今次炒邊科？佢話北泰管理層相當勤力，經常與芬佬同埋分析員會面，噚日有間美資行出報告品題北泰，所以表現咁神勇。
北泰噚日最高見過2.90元，收2.85元，升9.6%，成交股數增至1066萬股，金額2937萬元，美資行確係有威力。
經紀黃話，雖然製造汽車零部件的鋼材原料，價格上升好多，但據講北泰有意在亞洲其他地區搵啲較平嘅原材料取代，以減低影響。另外，除咗家陣的美洲市場外，公司又打算開發日本市場及發展其他種類的部件。
講完一大輪，經紀黃的結論，就係芬佬似乎幾受落，所以再捧北泰場。
另外，早一排炒到飛起的銀建國際（171），前日股價急回之後，噚日停牌搞配股，傳聞配股價2元，集資額成4億銀咁多。但經紀黃話，據講咁大批貨，只係幾個芬佬已經全部食晒，所以唔太擔心復牌後有沽壓。
慕容小初