落「新港」搵MC兄弟收料，佢哋喺「新港」已駐紮兩年幾，由時裝店順利轉型成潮流精品店，附近街坊都稱呼佢哋為「新港超人玩具」。MC兄弟做事非常勤奮，屬典型香港搏殺族，平日做門口生意之餘，重做埋eBay網上拍賣，以超筍價將舖頭賣唔去嘅貨散畀鬼佬客，生意總算係遍布全球；看舖時難免一心二用：左眼昅電腦，右眼昅客人，手執Mouse，把口重要不停嗌「隨便揀，隨便睇」。聽佢哋講，自從有「自由行」後，門口生意大增，碰啱eBay最近開埋香港網站，佢哋又要食住上，收舖後繼續網上工作，呢排每晚都捱到兩三點，一個星期開足七日，鐵人都捱唔住。問佢哋有冇做香港嘅YahooAuction？佢哋解釋呢個網只放到古靈精怪貨，要喺香港網站放潮流玩具非常艱難。所以佢哋批評香港YahooAuction最近以70's電視劇《狂潮》做主題嘅廣告唔Work，廣告中話可以搵到當炒關刀波鞋，其實香港拍賣網只流行AV產品。其次，香港拍賣網主流以二十零歲𡃁仔客多，咁佢哋又何來識得成三十年前嘅《狂潮》呢？或者，佢哋想擴闊客路喇。
主持人：大食Jack
八卦熱報：