中石油（857）批股size雖然大，但股價都叫做守得住，只係跌2.5%，收3.925元。多家大行繼續出報告話中石油抵買，真係唔到你唔服。
細價股通達集團（698）配股，表現亦唔差。話就話先舊後新配股，但舊股套現部份大過新股集資額，其實唔太好，不過隻股不但跌唔落，重要成為噚日升幅之首，亦係唔到你唔服。
通達今次賣舊股數量高達7億股，而只由其中一位股東認購新股2.275億股。換言之，以配股價0.20元計，沽出街的貨值，計落成1.4億元咁多。
一隻股仔散貨金額高達1.4億元，實在唔簡單。噚日復牌，股價大升27.2%，收0.29元，成交股數7.56億股，但減去7億股配股上板，實際只有5600萬股成交，好明顯係有人揸到成手貨，最厲害係唔沽貨獲利，睇嚟批貨應該落入大隻佬之手。
經紀陳話，市場傳聞通達稍後將展開一連串推介活動，至於會唔會成為另一隻受追捧的工業股，佢話唔敢講，要睇過先知。
慕容小初