關之琳昨日到中環出席時裝店開幕禮，她表示沒有因為梅艷芳離世而沉迷悲傷，她謂近年人生觀改變，不追求名利得失，只追求簡單生活。農曆新年之之將會陪男友黃家諾到日本滑雪，享受生活。
美國時裝品牌TSE，昨日在中環歷山大廈的新店開幕，請來關之琳出席開幕禮，其他嘉賓包括黃德如、陳嘉容、唐浩雯和傅潔恩等。
之之身穿全黑的茄士咩連身裙，價值九千多元。之之身穿黑衣，可是為悼念梅艷芳？她說：「唔係，係大會揀定畀我，我冇特別為阿梅着黑衫。」
問之之去年多位朋友逝世，是否令她改變人生觀？她微笑一下，然後說：「其實唔係因為阿梅，近呢幾年，我嘅生活都係日日吃喝玩樂，間中拍吓廣告，儲到錢就去旅行咁。」
之之續說：「我係一個普通人，唔會特別去諗生死。人生好短暫，亦好簡單，要享受每一天，唔好事事鑽牛角尖，太多強求，好多係整定。我覺得名利唔重要，有時都覺得自己入錯行二十年，我𠵱家日日都好開心，無論發生乜嘢事，情緒都唔會大起大落。」
之之又表示男友黃家諾（Jimmy）比她更樂觀，她說：「Jimmy唯一嘅壓力就係我，佢識到我，係我帶畀佢壓力。」她又表示兩人農曆新年將到日本旅行，她陪男友滑雪，男友則陪她吃魚生、牛肉等，她謂現時心廣體胖，足以抵冷。
採訪：JessicaNgan
攝影：ChanKwingWai
