無綫《2004年度國際華裔小姐競選》今個禮拜六喺將軍澳電視廣播城舉行，噚日二十一位候選佳麗就喺尖沙嘴香格里拉酒店首次會晤評判霍震霆、歐陽震華、陳慧琳、林順潮同黃浪詩。
二十一位佳麗自選一件便服同埋一件泳衣見評判，所以成班女仔，都精心挑選啲隆重便服出席，幾乎清一色係低胸背心，大騷哥利。
《華裔小姐》競選當晚，有好幾個表演嘉賓，好似張栢芝、許志安、古巨基，同埋陳小春，但係噚日記者會就得小春一個到，點知佢一上台就俾司儀王賢誌勁寸，王賢誌問小春喺《華姐》表演啲乜，點知佢話：「我知栢芝同基仔就會武刀弄劍，我就唔知自己做乜。」王賢誌就即刻食住上話：「你一上嚟就講栢芝，但係你自己做乜都唔知，淨係掛住栢芝。」
周渝民（仔仔）嘅新唱片剛推出就已經有好反應，唱片公司噚日為佢舉行慶功宴。活動上有「破金雞蛋」嘅儀式，因為仔仔生肖屬「雞」，「破金雞蛋」除咗代表仔仔係一隻會生金雞蛋嘅「公雞」外，破蛋嘅意義都希望仔仔新唱片能繼續喺亞洲熱賣。
之前因為廉署「舞影行動」而被調職嘅無綫高層何麗全，前日已經返番去綜藝科原來崗位。噚日下晝馮仁昭撞見何麗全，問到英皇高層吳雨有冇同佢慶祝嘅時候，何麗全笑笑口話：「冇乜值得慶祝。」佢話工作上冇乜改變，一切都係正常運作，不過，始終返番原來崗位，對佢嚟講梗係熟悉啲嘅。
王菲與謝霆鋒嘅戀情畫上句號後，即有傳聞話內地藝人李亞鵬熱烈追求王菲，一日以手提電話傳一百個短訊畀王菲，𠱁得王菲鬼咁開心，李亞鵬知道王菲喺上海病咗，又專程飛到上海探望佢，令王菲非常感動。不過王菲就透過經理人陳家瑛話：「對呢啲傳聞唔想多講。」唓！次次都話唔表態，遲吓咪又係拖住出現！
張衞健噚日去咗台灣宣傳電視劇集《聚寶盆》，佢表示現實生活中，對數字冇乜嘢概念，張衞健話：「從第一日嚟台灣開始，我就只係記得一百蚊新台幣，大約等於二十五蚊港紙，去日本食嘢，我都只會將錢拿出來畀老闆自己揀。」張衞健重話曾經投資房地產失利，試過銀行戶口只剩低七萬蚊。最少都重有七萬，已經好過好多人啦！
劉曉慶涉嫌逃稅嘅案件𠵱家重未了結，幾個月之前佢已經交咗幾十萬稅，但國家稅務總局副局長崔俊慧噚日喺記者會講，話呢件案已交咗畀司法部處理，到目前為止，劉曉慶間公司已經交咗一千六百四十六萬稅款，𠵱家重欠三百幾萬，如果佢畀埋，應該可以冇事，唔怪之得劉曉慶𠵱家咁鬼搏命搵銀啦！
