華朗兩年半前喺意甲轉嚟英超後就衰足咁耐，除咗因踢得差而俾曼聯掟去車路士外，喺星期日重俾賊佬入屋打劫。
事發時華朗同女友瑪莉亞瞓緊覺，但俾人嘈醒後，見個揸住開山刀嘅男人企喺面前。佢話個賊用刀「行」佢條頸，重話如果唔交出財物就殺死佢三個細路；於是佢開夾萬交出總值約七十萬港元珠寶；個賊得手後就鬆人，但喺星期一就俾差佬拉咗。
華朗過去兩季喺曼聯跌WATT，今屆轉過車仔諗住重振雄風，點知因背傷，自舊年十一月尾休息到𠵱家；家陣又搞到差啲連命都冇，認真黑仔。另佢係繼阿仙奴簡奴同亨利後，近年第三個俾賊入屋打劫嘅倫敦球會球星。倫敦治安咁差，對車仔同阿仙奴第日斟大牌球員，會唔會有影響呢？
唔識博12碼捱罵
佩魯賈前鋒保夫萊特今季喺意甲算搶鏡，場上鬥志及體育精神都值得表揚。偏偏佩魯賈教練哥斯美唔係咁諗，重責備保夫萊特唔識跌低博十二碼係戇居！哥斯美你咪忘記，保夫萊特係英格蘭球員，佢哋嗰種傳統鬥志及拼勁，梗係唔同你哋班成日跌低博對手犯規嘅意大利佬啦。
安慰獎當補數
歐洲足球先生祖記嘅尼維特同羅馬嘅托迪，日前分別攞咗去年意甲最佳外援同最佳意大利球員獎，兩人重一齊做埋意甲最佳球員。不過我求大俠就認為托迪始終爭啲！佢上年成日話自己有資格做歐洲足球先生，我求大俠就當係笑話，𠵱家佢喺國內威番次，算係執番個桔啦！
教上海申花博乜
有外電話荷蘭「三劍俠」之一嘅尹巴士頓希望可以去中超教上海申花，要求重幾低㖭。我求大俠真係一頭霧水，以佢嘅名聲，又喺阿積士做緊助教，點會無喇喇去中國發展，另外兩位「劍俠」列卡特教緊巴塞、古列治將會教飛燕諾；難聽啲講句，尹巴士頓唔係搞成咁呀！
獲加薪即讚烏記
烏甸尼斯近期戰績麻麻，會方終以加薪一倍幾嘅條件同中場比沙路續約。條件咁好，比沙路當然簽字都簽唔切，重話球會對佢不知幾重要，恨不得即刻落場爭佳績喎。睇怕佢已經唔記得被雪藏時大鬧球會摧毀佢事業、要即刻鬆人。原來個「錢」字足以改變一個人嘅立場。