日本偶像組合Morning娘自入行以嚟，有關成員同邊個尊尼仔拍拖、或者同邊位女星嗌交嘅負面新聞可謂多不勝數，就連平日一臉清純嘅隊長飯田圭織，都試過俾人影到去party嗰陣又煙又酒嘅照片，佢同班姊妹一樣，見到靚仔就暈晒大浪兼儀態盡失！
最近就有日本觀眾發現，Morning娘喺上年大除夕演出《紅白歌唱大賽》嗰陣，隊長飯田圭織同是非精矢口真里趁冇人留意之際，上前攔截人氣組合SMAP，重主動搭訕中居正廣同香取慎吾兩位猛男，佢哋傾到雞啄唔斷，而兩位晨女亦露出發晒姣嘅表情，當中飯田電完中居再向香取放生電，認真猖狂。
講開又講，晨女新年期間做加長版電視節目《SMAP×SMAP》嗰陣，亦令唔少觀眾不滿，有網民話嗰晚除咗希美表現最正常之外，其他成員對住SMAP嗰陣姣到阿媽姓乜都唔記得，十足十俾男人攬住一樣咁enjoy，而飯田同香取同台演出期間，又一邊摸佢個頭一邊露出好享受嘅表情，睇到唔少SMAP嘅fans眼火爆。