淡友噚日想借中石油（857）配股消息將港股質低，恒指曾跌189點，但其後又大幅反彈，倒升44點收市，係大戶典型的先殺好友，再挾淡友的手法。不過，由於大行紛紛唱淡滙豐（005），淡友似乎仍未服輸，企圖想藉此力壓港股升勢，但英鎊咁強，淨係炒滙價都賺到笑啦，美元一日未轉勢，唔係太多藉口可以唱淡滙豐。
英國石油沽完中石油後，市場驚佢又會沽埋中石化（386），中石化噚日一度大插8.5%，跌破3元，其後跌幅收窄至1.5%，收報3.20元。
英國石油以每股成本價1.28元買入中石油，於3.70元沽出，回報率高達1.89倍。英國石油持有中石化19.6億股，每股成本1.59元，若以3.20元折讓8%配售，配售價2.944元，回報率只得85%，可套現金額57.7億元，唔算好吸引，但英國石油一向不長期持有其他公司少數權益，所以日後必沽中石化。
市場傳聞，呢兩日有人為信置（083）配股試盤，但就未有定價。投資者聽聞信置有配股意向，即刻有反應，信置噚日被質低5.7%至5元，連帶新世界（017）都一度被質低7.4%，低見7.50元，但由於新世界未有傳出試盤，股價最終反彈，只跌2.5%，收7.90元。黑客話，信置配股行動最終可能告吹，因為樓市向好，利息低企，唔排除公司會向貸款市場方面埋手。
此外，值得注意係連標普都轉View睇好樓市，二手樓市亦開始轉活，投資者入市掃貨消息陸續有來，今次樓市反彈，絕對唔似小陽春。
阿 虎