中石油(857)過百億「披成」又大超額認購,散戶分配比率約20%,連日來圍繞國企的不利因素一掃而空,國企終止跌回升,好多重出現單日轉向。中石油披成價3.7元,噚日最低都只係造3.825元,收3.925元,全日見大行枕住收集。市場資金充沛,雖集資近130億,毫無影響。
先講大市,噚日高開,但中段一度插得好深,恒指落到13162,跌189點,但午後又見有大盤掃貨,結果恒指上番13400水平,收報13396,升44點,成交再大增到387億元,又打破上月16日中銀(香港)(2388)披成日的344.7億元,唔計披成,成交都過250億元,日日都200幾億元,個市重有排上。
國企股轉勢,雖然國指收4811,仍跌38點,但好多國企由低位反彈個勢好勁,唔少重倒升。睇番國指張圖,今個升浪由去年11月21日的3472起步,升到1月5日的5441,調整0.382,支持位4688;若由上月17日的4050起計,調整升幅的0.618,支持位4581。噚日國指最低4626,剛好在4688至4581區域內獲得支持。中石油「搞掂」後,相信短期內唔會再有大型嘅披成(聽聞江西銅(358)唔會發新股集資),國企經今次咁「深」嘅調整後,可以重上升途。
國企回升,最強勢又係石化同鋼鐵股,其中尤以北京燕化(325)最勁,中段曾一度插到2.75元,但午後掃番上3.125元收,倒升0.225元,升幅7.7%;其他如儀征(1033)升1.25%,而吉林化工(368)亦升1.9%。
上海石化(338)喺上一個升浪中,一路都見有大行不斷收集,呢隻股票同燕化一樣,應該已收乾,下一個升浪,大有機會再創新高。上石化噚日亦曾經跌穿3元大關,低成2.95元,但午後一抽,又上番3.25元,升7.5仙,升幅2.3%,5分鐘圖已形成頭肩底,升穿3.25元,好快會見3.55元。睇遠啲,上石化前高位係3.775元,若升破,可見4.2元。
上石化已進行擴產,加工能力將由每年280萬噸增至800萬噸,對長線的盈利好有利,以05年的預測PE12倍計,股價有力升見5元。
郭兆誠