立法會聆審世衞組織高官陳馮富珍，進入戲肉，陳馮富珍變咗陳余麗珍，喺立法會內外，面對議員同記者，痛哭兩場，破香港開埠以來官場最高嘅雨量紀錄。
陳馮話，佢好後悔當日點解畀淘大嘅沙士病客咁早出威院，如果唔係放虎歸山，淘大8E座就唔會成棟樓中招，一發不可收拾。
講到呢處，民建聯嘅土共女將陳婉嫻，發揮左仔特有嘅批鬥階級敵人嘅專業本能，以公審港英餘孽嘅氣概，質問陳馮當日延誤時機，係咪反應太過冷靜？呢句說話，好似把尖刀，直插入陳馮富珍心靈最脆弱嗰點，陳太一聽到，即時痛楚萬分，淚落如雨！
土共即係土共，陳婉嫻羞辱陳馮富珍，好似大陸嘅針灸師，揀正穴位，民主派日鬧夜鬧，都冇辦法激到一個高官喊，由港共女幹部出手，果然一插即時入位，所以千祈咪睇小民建聯，一旦轉軚做咗反董嘅民主派，嫻姐發揮女紅衞兵本色，殺傷力重勁過十個長毛加一百個劉慧卿！
陳馮富珍係陳方安生嘅手袋黨成員，左仔睇見都眼火爆，重成功打埋入荷李活，走去世衞組織做官，出美金糧！唔解條皮帶出嚟抽佢幾嘢，已經好畀面。可憐陳馮富珍當年讀醫科，做AO，殖民地時代天之驕子，今時今日，就俾一個左派工會女頭目鬥到冇晒尊嚴！
不過，陳馮受屈，又真係幾冤枉。佢只不過係衞生署長，佢嘅頂頭，即是楊永強，喺三月十四日，公開拒絕封院隔離，堅持沙士並無喺社區爆發，話唔可以令公眾恐慌！
咁都唔止，大陸國家領導人、朱鎔基嘅頭馬龍永圖，三月二十八日，喺香港破口大罵香港傳媒，話傳媒誇張疫情，打擊香港嘅旅遊經濟！
今日，陳馮富珍識得喊，楊永強又識唔識喊？龍永圖會唔會流淚？定係陳馮富珍始終都有少少人性同天良，後悔冇好似陳方安生一樣及早抽身遠走高飛，留喺呢個政府，搞到自己個名，同埋張文康一樣，喺歷史上遺臭萬年？
董班子毫無權威，唾面自乾，而對沙士瘟疫佢毫無高度自治嘅自主權，向廣東省攞料叫天不應，今時今日，政制改革呼聲高昂，佢又要擰轉身睇北京面色，港人呼聲叫地不聞。呢啲咁嘅政府，要嚟有乜用？陳馮富珍都重識喊，阿董搞亂檔七年，到今時今日對市民木口木面，對議會藐嘴藐舌，重係人嚟？
傳真︰2623-9278
電郵︰