衞生署前署長陳馮富珍，自從榮獲鬼佬睇起，成功打入荷李活，做咗世衞組織（不過係亞洲區）國際高官之後，聽講本來有問鼎聯合國助理秘書長嘅希望，繼高行健、馬友友、貝聿銘等，成為成功衝出唐人街「揚威海外」嘅「中國人的光輝」，點知，立法會係都要憎人富貴、係都要將陳馮夾雞挾返香港，出席沙士大醜聞嘅聆訊。
點知，高等華人兼國際高官嘅陳太，爆出間諜史上驚人內幕，透露佢喺沙士期間，點一個副手打電話上廣東衞生廳了解沙士內情，點知電話冇人聽，於是佢膽粗粗咁拉北京中央衫尾，接觸北京市委衞生廳，點知就獲得告知：沙士係傳染病，傳染病嘅資料，屬於「國家機密」，不准外洩！
陳馮夾雞嘅祖宗三代，可能施捨過好多乞兒，放生過好多隻果子狸同金錢龜，所以積咗好多陰德！因為陳馮及其副手，冇大冇細咁打電話上去廣東省索取沙士資料，已經犯咗意圖刺探國家機密罪，以現時大陸法例，至少判囚十年，好在廣東省衞生廳共幹維護領土完整、民族尊嚴、國家安定嘅警惕性高，冇接電話，若果唔係，國家機密外洩，後果真係不堪設想！
陳馮事後一定知道自己犯下彌天大罪，愈諗愈面青，於是當聯合國嘅外國勢力一向佢問價招手，佢就拿拿聲辭職，連董班子嘅工都唔敢再撈，匆匆忙忙執埋啲長衫旗袍打包，即時投靠西方。今時今日，佢揸住本聯合國護照返嚟，有黑柴秘書長安南照住，好彩23條又未通過，如果唔係，董班子可以指示李明逵落柯打，即時將陳馮富珍逮捕！
經陳馮富婆噚日一篤爆，香港嘅傳媒同香港人，真係對所謂「以民為本」嘅所謂「胡溫新政」有更加準確嘅認識，對溫家寶早一輪吟詩，話「淺淺的海峽，就是最大的鄉愁」，有更加高層次嘅理解──原來這小小的沙士病毒，是大大的國家機密，可以隨時將一名記者，塔往秦城監獄，等佢有香港歸不得，變為最大的鄉愁！
陳馮見過鬼怕黑，所以走得快，好世界。嚇到連袁國勇有冇打過電話畀佢，佢都失憶埋！唔係個個高官都有佢咁好命。現時嘅林衞生署長，港大醫學教授袁國勇，同埋衞生福利食物局嘅儍強，如果向廣東省衞生廳攞資料，就即時個個企圖刺探國家機密罪名成立！
而今次第二鑊沙士，唔知點解，廣東省衞生廳據說竟然主動向董班子提供資料喎！嘩，真係有咁多，真係唔止蔡小洪一個特務咁少喎。
所以今次沙士再襲港，香港人要愛國，正所謂沒有國，哪有家，寧願人人中沙士，全港六百萬人全體為捍衞國家安全英勇捐軀，都唔好再問中央索取資料！咁樣，先至對得住林則徐以來嘅民族先烈㗎嘛。
傳真︰2623-9278
電郵︰