新春佳節就快到，經濟好番少少，坊間嘅新春活動都多過往年，好似中聯辦社工部噚日就喺會展搞咗個新春酒會，八方一心走去捧場，無奈未到門口已經被下逐客令，冇辦法，打肥佬黎份工就有咁嘅代價。
一門之隔，新春酒會入面，好多人大吃大喝。據聞工聯會鄭耀棠周圍同人講新年去旅行，原來佢冇耐前同老婆去過上海，有朝喺上海大廈食早餐時，有位男士問佢係咪姓鄭，原來嗰位係中聯辦以前嘅大廚，不久之前調返上海。呢位大廚最令棠哥印象深刻嘅，就係將大魚頭去骨之後放入砂鍋煮，啖啖肉，好食到不得了。
講開工聯會，有人問棠哥會唔會學民建聯咁同政府劃清界線？棠哥當然話唔會啦，佢話政府啱就讚，唔啱就彈，而佢從來唔會怕被指保皇就唔去幫政府，重反問做乜要做縮頭龜㖭！咁究竟邊個係縮頭龜？佢就猛話身邊冇喎！
（圖〉中聯辦副主任高祀仁（中）噚晚去新春酒會，主動大鬧英美「說三道四」。
傳真︰2623-9278
電郵︰