政府上個禮拜公布勾地表內容，中原地產為此做咗個網上調查，總共有七百一十人投票，大部份都覺得會利好樓市。
有逾四成七受訪者認為勾地表對樓市影響係「十分正面」，覺得「無甚作用」只得一成八。對於勾地表提供嘅單位數量，約四成八指「相當平衡」；認為「供應仍多」同「供應較少」嘅比例相等，都係兩成六。另外，超過一半重估計有地皮推出拍賣之後，樓價會有顯著升幅。
中原測量師行副董事張競達話，從投票結果嚟睇，勾地表公布屬正面消息，後市可看高一線。佢又估計發展商會積極投地同賣樓，但提供畀買家嘅優惠就會不斷減少嘞。
事實上從呢幾日市場嘅反應嚟睇，買賣非常活躍，樓價重係咁升㖭；同調查嘅結果好一致。
電盈持有嘅山頂中峽道二十四號，即電盈前副主席張永霖舊居，委託第一太平戴維斯招標，下月二十號截標。唔知係咪市道好咗，呢間可建樓面八千一百六十五呎嘅大屋，早排市場估計值一億，第一太平戴維斯估計現市值一億五至二億，且有唔少本地工業家查詢。
住宅銷售部董事方文彬就話，山頂獨立地段大屋數量罕有，對上一次買賣係隔籬中峽道二十六號，九九年以一億四千八百幾萬成交。
仲量聯行亞洲區投資情緒調查指出，香港會係今年房地產投資首選熱點。該行投資部主管盧慶雄話，唔少國際投資者正積極喺香港搵貨，資金重好可觀㖭。五大入貨對象，第一位係店舖，其次係寫字樓，第三位係住宅；住宅重係第一次入選五大。
調查嘅對象係房地產基金、私人投資者、房地產業務機構同房地產投資信託基金，受訪行政人員數目超過二十名。
樓市轉旺，踏入04年未夠半個月，美聯物業已經誕生咗七間百萬元營業額分行，當中，唔少係專門做豪宅嘅分行。好似成績最好嘅淺水灣分行，營業額二百零七萬。沙田駿景園剛錄得一百零一萬營業額，沙田大埔區營業董事鄧天勇話，淨係今個月該行就做咗九間何文田君頤峰買賣，認真唔嘢少。佢話舊年沙田大埔區全年有一億二千萬營業額，今年區內有幾個新盤推出，例如比華利山別墅，目標係億八生意。
大有機會成為今年新盤頭炮嘅荃灣朗逸峰二期，長實今日先同兩間大型代理搞誓師，聽長實高級營業經理黃思聰講，今個禮拜尾開放示範單位畀傳媒參觀，下個禮拜就全面開放，準備農曆新年檔期發售，主打逾一千二百呎三房，換樓客為主要對象。
蘭西
電郵地址：