日本富士Impreza響越野車界所獲得嘅成就，世界各地車迷有目共睹；惟一直以來，車迷放眼嘅焦點，均在於2.0公升Turbo版嘅ImprezaWRX身上。然而，近期香港代理有意打破傳統，正準備首度引進1.5公升自然吸氣版嘅Impreza1.5i型號。
有見及此，早前代理商更安排咗一班本地傳媒，前赴馬來西亞Sepang賽車場，跟一眾新加坡及當地嘅車主，實地測試各部不同車款，而我哋嘅焦點，自然會係快將抵港嘅Non-Turbo版Impreza啦！
記者、攝影：李勤
響賽道上放置有雪糕筒，大可駕駛不同類型嘅富士AWD車款，體驗四輪帶動所演繹出嘅行車穩定性。
唔少人遇上緊急煞車時，都會變得手足無措，惟以70km/h嘅時速下猛然落Brake，會同時間觸動ABS系統，由於未有鎖死四輪關係，駕駛者大可扭軚逃離險地㗎！
分組響Sepang賽道上駕駛，可感受吓賽車手滋味之餘，重可以實地體驗出AWD系統嘅可靠轉向一面，嗰份穩妥感實非筆墨可形容。
富士Impreza向來予人印象深刻嘅，相信會係車系中至頂級嘅ImprezaWRX街版辣車；然而，除車子本身一台高達280匹馬力輸出嘅2.0公升Turbo偈，備受矚目之餘，查實廠方向來標榜嘅恒式四驅AWD系統，亦跟部車本身外在嘅惡形惡相包裝，同樣受到重視。
而遲吓正式引入嘅Non-Turbo版Impreza四門轎車，外形大抵跟Turbo型號相若，同樣擁有一對炯炯有神嘅雙圓頭燈，以及簡約嘅鬼面罩設計；當然少不了重有泵把連大型氣霸組合，還有原廠霧燈及尾定翼配搭，一副既有活力又富動感嘅造型，響一眾同級對手之中，都可謂既突出又見吸引力㗎！
講到車廂鋪排，筆者響馬來西亞所測試嘅DemoCar，備有全車真皮座椅配搭，講求實用之餘，更加添一份豪邁感。前後兩排空間寬敞舒適唔在講，就連座椅嘅剪裁亦見貼身富承托感，而駕駛席之間重備有座墊高低調校㖭！
再者，除置有Momo四幅式真皮跑車軚環、真皮波棍予人跑意鮮明外，不可或缺嘅四門電窗、門邊電鏡、原廠冷氣及高級CD音響、雙安全氣袋亦見一應俱全呢！
今趟實地試車，較特別嘅地方會係多部DemoCar，均屬出口新加坡嘅Impreza1.6TS型號，惟代理給本地傳媒嘅資料，遲吓抵港嘅則會係Impreza1.5i型號，無論馬力及扭力輸出均相若，故我哋測試嘅時候，倒集中於加速感、操控性同巡航表現。
難得此車予人嘅感覺係，雖然輸出唔算突出，但起跑加速感不錯，加上一套先進4前速自動波組合，無論Kick-down加速或EngineBrake時，仍見有敏捷暢順一面；加上備有恒式四驅AWD系統關係，賽道上嘅操控及循迹反應，亦予人可靠又穩妥之感。
記者評語
賽車場上見真功夫
今趟馬來西亞之行，較特別會係響著名一級方程式賽車場—Sepang，測試呢部非Turbo版嘅Impreza，由於部車本身備有恒式四驅AWD系統，應付彎道可謂綽綽有餘；雖然輸出不過100匹馬力，惟配合上4前速自動波，加上中、低轉扭力輸出平均，表現亦見不俗。
富士Impreza1.5i規格
引擎：1493cc水平對向四汽缸SOHC
馬力：100ps/5200rpm
扭力：14.5kgm/4000rpm
傳動：4前速自動波，恒式四驅
懸掛：（前）柱式獨立（後）柱式獨立
制動：（前）透氣碟（後）鼓式（ABS）
輪胎：195/60R15FalkenAzenis
尺碼：4415×1695×1440mm
軸距：2525mm；車重：1260kg
平均耗油：14.2km/L
新車售價：約港幣14萬
查詢：意美汽車（23968380）
