松浦亞彌最近啱啱先推出咗新碟《×3》，跟住後日就再推出佢入行以嚟第三本個人寫真集。唔知係咪佢啲同門姊妹Morning娘輪住出個人寫真出到滯，所以終於要出動keep得住人氣嘅松浦影新寫真嚟救市？
松浦今次本寫真集拍到好有公路電影feel，松浦話希望啲fans睇住佢本寫真集，就會有同佢一齊去旅行嘅感覺喎。
不過松浦係個大忙人，上年年底要為新碟錄音，又要籌備舞台劇，所以好難出國為寫真取景，於是攝影師搵咗唔太遠，但又多靚景嘅沖繩做背景。
松浦話沖繩嘅甘蔗田、美式建築物，都好有特色，慣咗東京生活節奏又快又緊張嘅佢，亦好鍾意沖繩人嘅節奏比較慢，生活得比較悠閒，令佢拎住行李篋拍寫真都好feel啲。
而最令fans覺得好彩嘅，相信都係沖繩嘅天氣比較熱，令到松浦可以坦蕩蕩咁影水着寫真。
今年重係十八歲都未夠嘅松浦亞彌，入行以嚟一直保持住青春儍大姐嘅形象，雖然網上好多人話佢同w-inds主音橘慶太拍拖，不過佢就至今都未斷正過喺狗仔隊手上。有傳今次佢影水着時胸前所戴嘅頸鏈就係慶太送嘅，莫非佢真係晒命？