秘書V放假去上海杭州，食蟹食到生暗瘡，佢話上海虹橋迎賓館入面嘅新光酒家國寶級「方亮蟹宴」幾出名，但價錢亦好貴，佢哋成班人食嗰款係每位九百二十元人民幣，可見上海做遊客生意或本地人生意，利潤甚為豐厚。
本來食得咁過癮，應該好開心至啱，但新年銷假返工，佢已經面有不虞之色，有啲嬲嬲地喎，問清楚秘書V點解，唉，呢個世界好多嘢都係整定嘅，冇運之時，乜好奇怪嘅衰嘢都會降臨在你身上。
秘書V個姨甥女Y，廿一二歲，青靚白淨，可人兒也，聖誕假期到太子道某豪宅大廈探朋友，停車場內泊好架車，行出閘口之際，突然之間牆上一條污水渠管爆裂，液體飛彈而出，滴落靚女Y身上，臉部、恤衫、牛仔褲都濕咗，塊面一陣刺痛，牛仔褲竟然立即穿窿，為之大驚失色，好彩閘口旁邊有一條水喉，立即撲埋去用水洗面浸面，佢朋友立即報警，將靚女Y送入廣華醫院，證實係俾鏹水之類嘅硫酸液體射中，隻眼冇中招算係重有後福。
警察調查後，知道係樓上一位業主用硫酸液體洗廁所，濃度過強，導致啲年久可能失修嘅污水管破裂，偏偏爆喉之時，靚女Y就行往該處，認真係啱啱撞着剛剛，冇運之至。左丁山聽完故事，立即向秘書V推薦整容皮膚醫生，睇吓有冇後患先。香港表面好先進，但大廈老化者多，住客業主一個唔小心，就會製造意外，傷及無辜。好似大編輯咁，住響十一樓，因大廈電梯俾十樓爆水管波及水浸，停開一個星期，日日行上行落十一層樓梯，有苦自己知也。