大市現時咁旺，上市公司唔趁勢批股先至奇。噚日除咗中石油（857）第二大股東英國石油配售中石油股份，金額高達百幾億銀之外，其實重有其他細價股配股，其中一隻就係早排小初都提過盛傳會批股的上海銘源（233）。
上海銘源噚日停牌，小初曾經問過幾間行，但都聽唔到以乜嘢terms批股，結果都係經紀陳消息靈通，佢話市場傳聞，上海銘源今次以先舊後新方式配股，每股0.60元，配售1億股，集資金額6000萬元。由於人哋係搞私人派對，股份唔會派到一街都係，所以街外唔清楚亦唔出奇。
銘源停牌前收0.68元，較傳聞中的配售價，有折讓11.76%，真係話大唔大，話細唔細。
另外，去年炒過一輪嘅紡織股華豐紡織（364），將在本周五公布全年業績。經紀陳話，市場估計業績表現OK，加上呢排好幾隻大型紡織股股價上升，所以華豐亦跟隨造好。
華豐噚日升6%，收1.04元，成交股數2228萬股，金額2286萬元，可留意短炒。
慕容小初