一月係轉會天，但係有份量球星轉會唔多見，直至祖記件戴維斯借咗去巴塞先至有睇頭，不過我求大俠就質疑，綽號「鬥牛㹴」嘅戴維斯可以幫到中衰嘅巴塞幾多？
首先巴塞嘅荷蘭籍教頭列卡特根本唔知可以留到幾耐，所以佢重用嘅荷蘭兵存在散班可能。就算唔散班，荷蘭兵喺巴塞近年根本已經係少有貢獻，戴維斯就算同班荷蘭同胞夾慣；但係唔代表巴塞一定會有好結果。𠵱家最驚嘅係戴維斯本人嘅心態，因為佢俾祖記放棄始終會有啲打擊。
巴塞近期表現確係好番，有番啲隊型，主因都係用咗兩個土炮恩尼斯達同沙治奧加西亞；但係最重要係管理層跟住點樣做，否則就算成隊波係荷蘭兵，結果都可能係一樣唔多掂。
魯斯度斯人獨憔悴
巴塞大勝薩拉戈薩固然令上下笑到見牙唔見眼，但係土耳其門將魯斯度（圖）唔知會喺歡笑後面會唔會垂淚，因為呢場聯賽之前兩場佢都為巴塞把關，結果佢連續犯錯令球隊兩場波輸晒，對薩軍終被貶為後備，由後生仔維迪斯再把守獨木關，魯斯度再係咁落去，真係前途似咁。
博軍歇冬後連捷
中田英壽及時傷愈，前晚首次代表博洛尼亞出賽對萊切。雖然中田喺場波表現唔算搶鏡，但隊波最終贏二比一，今季宣布作客「開齋」。博軍歇冬後已兩連捷，雖然中田上一場無份踢，但家吓個個都當關晒佢事，讚佢腳頭好。中田咁旺，教練馬索尼肯定攬住佢嚟錫。
場內場外萬千寵愛
我求大俠已經唔止一次讚過卡卡，呢個炙手可熱嘅球星前晚省入兩粒，幫AC米蘭反勝里賈納；賽後佢重第一次以意大利文接受傳媒訪問，答得頗為流利。AC會方同埋眾隊友一直咁照顧佢，令佢無論喺球場內外都咁掂。會方喺佢身上投入咁多資源，斷估皇馬都撬佢唔郁嘞。
全靠紅魔雪芳蛋糕
英國傳媒日前爆料，原來雲尼斯達羅之所以喺球場咁勇猛，原來係每日都會整件雪芳蛋糕啃吓。「雲佬」食嘅雪芳蛋糕，當然唔同我哋喺超級市場幾蚊買到件嗰隻，而係曼聯廚師特製。據講「雲佬」承認每場波最後十五分鐘嘅動力，就係嚟自啲蛋糕，認真唔講得笑。