港股終於出現調整，一來係連升10日，二來係傳了多日的中石油（857）配股落實，今次係繼中銀（香港）（2388）之後另一單過百億的抽水行動，英國石油（BP）搶先其他中石油的策略性股東，衝閘而出，配售35億股，集資約120多億元。
不過，大市在高位承接力仍好強，恒指且一度創出13414的日中新高，收市13352，徇眾要求，微跌33點，成交縮到226億元，跌市成交少，係好現象，睇埋期指，對後市重有信心，噚日期指尾段有大盤掃入，高收13438，升34點，高水更擴大到86點。
芬佬對後市信心十足，話個市調整，理所當然，但幅度唔會大。雖然大型抽水會陸續有來，但香港水頭充足，噚日金管局又接多億幾美元，資金流入的趨勢一日不變，港股都唔會太受集資所影響，調整完成後，恒指可見14000至15000。
新勾地表令未來幾年的樓市供應維持在有限水平，刺激地產股價大升，預計06至07年，樓價將因短缺而大幅推高。多家大行噚日紛紛發表報告，建議增持地產股，綜合佢哋嘅睇法，長實（001）目標價為77元至80元，新地（016）77元至89元，恒地（012）49元至51元，嘉里（683）15元，同新世界（017）8.5元。
太古（A，019）係大型綜合企業，雖然主要持有商廈同商場的投資物業，但由於住宅市道前景改善，商業樓宇的復甦亦會較預期為快。在噚日的地產股升潮中，太A未有跟上，收51.75元，僅升兩個位，但晨早已見有異動，在開市前交易時段錄得3手大成交，合共222萬股總值1.1億元，而全日亦見大行壓住價收集。收市後同芬佬傾開，佢哋話係有幾家大行一路買緊太A，相信好快就會開車，目標指向6字頭。
睇番太A嘅周線圖，由02年5月開始，足足收集咗年半時間，形成一個大圓底，望落去似曾相識，原來同地鐵（066）幾乎一個模「吸」出嚟，造完支「柄」後就出現突破，短線目標係58元，中線量度升幅可見74元。
樓市確認復甦，富豪（078）終升破20仙大關，收20.2仙，仍可持有，目標22仙。滙漢（214）收2.6元，升0.1元，折讓仍逾80%，係另一隻可食大茶飯對象。
郭兆誠