美股上周五挫逾百點,但地產股繼續造好,雖然未能令港股連升11日,但總算支持恒指靠穩,全日只微跌33點,收報13352,成交仍高達226億元。地產股造好,可能會誘使地產商配股抽水,唔能夠唔防信置(083)同新世界(017)隨時又發動抽水機。
美林唱淡中銀香港(2388),叫客沽貨,搞到中銀有啲腳軟,跌1.3%,收報14.70元。不過,唔好唔記得「樓市好,中銀好」呢個道理,唔好忽略中銀按揭貸款撥備可能回撥呢條數。
中石油(857)配股消息終於得到證實,英國石油話要配售35億股,每股3.58-3.70元,向市場抽水125-130億元。配股消息已於市場傳咗一段時間,令國企股近期明顯受壓,中石油同中石化(386)噚日挫逾5%。近排中石油的沽空增加唔少,反映大戶早已為今次中石油策略性股東沽貨作好準備。據聞認購反應理想,有芬佬投訴分得好少貨,今日中石油股價就算再跌,亦應該唔會破底。
寶福(021)34.87%股權易手,每股作價7.64元,較停牌前3.075元,有溢價1.48倍,昨復牌大升13.8%。不過,買家沈松寧為咗避免全購,將4.88%沽畀慈善機構,做小股東認真谷氣。其實收購價仍較寶福去年6月底每股資產淨值22.93元,折讓66.7%。
寶福主要係投資地產及證券,現時金融市場暢旺,樓價反彈,寶福資產值上升機會大過下跌好多,呢種股份最容易成為狙擊手的目標。
阿 虎