美股杜指自去年12月中突破10000點大關後，未出現過較大的調整，上周五終於藉12月就業數據未如理想而大幅回吐，杜指單日急跌133點，跌幅之大為近期少見。除了就業數據欠佳外，部份電訊公司被調低投資評級，亦令美股受壓，3大指數皆以接近全日低位報收，但一周計則仍有進帳。
噚日同芬佬茶敍，一枱人天南地北，大發偉論，筆者一路收料，又聽到一隻靚股，就係03年度（12月年結）上半年盈利大減9成嘅地鐵（066），嗰位在大行揸弗嘅仁兄煞有介事話，呢隻股票千祈唔好睇小佢，𠵱家買落去，時機未到時，就收住息先（估計有接近4厘息），水到渠成時，分分鐘可以升幾十個巴仙，到時就真係財息兼收嘞！
返到屋企，立即㩒地鐵張圖嚟睇，果然令人心動，成個大圓底嘅收集形態，若睇周線圖，重靚，𠵱家重突破咗。呢類走勢一破位，通常都有30%至50%嘅升幅。地鐵上周五急升6.5%，收報11.50元，話唔定到年中就會見15元。
香港經濟好轉，對地鐵好有利，好似地鐵旗下商場人流已大增，新簽的租約，租金分別上調5%至20%不等。另外，集團位於青衣盈翠毗鄰的地皮，亦計劃申請興建中價酒店，提供1100個房間，以配合未來迪士尼樂園的旅遊發展。
重有，集團一路拓展海外業務同其他收入來源，與北京市合建機鐵項目，磋商已近尾聲，總投資額50至60億元，地鐵佔20%，預計07年通車。除北京外，集團亦會在上海和深圳物色鐵路投資項目。最重要一點，就係集團並無計劃將物業發展權交還政府，未來數年物業市道轉旺，地鐵資產增值的幅度將會更大。
不過，以上幾點，橫睇掂睇，筆者都唔認為可以將地鐵股價推高幾成咁多，忽然間靈光一閃，醒起兩鐵搞緊合併，呢單deal嘅影響，先係屬於「可大」嗰類，嗰位芬佬大哥應該係收到風嘅。
政府現時正研究兩鐵合併，而計劃配售地鐵股份亦拖延，若合併對地鐵有利（地鐵股價上升，政府一樣受惠），大行自會提高評級，屆時地鐵升幅再大啲，唔好話冇可能。
郭兆誠