特區政府立法會全面直選，行政長官普選（統稱政治體制檢討）事到如今，睇怕都係要聽候北京大人發落。曾蔭權率領三人小組搜集本港民意，與中央溝通，只係表面工夫啫，畀個天佢做膽，佢與董特首都唔敢違背北大人嘅意思，只希望佢哋提出嚟嘅建議，唔好太過乞人憎，再搞一鋪二十三條立法事件而已。
講選舉，北大人一定有顧忌。肥彭以前在香港威風嗰陣，講過一句話好抵死，就係：「北京要嘅，係『出閘者』就知道邊隻馬會贏。」設計一套選舉制度，下下設防，唔畀民主派贏晒，所以我哋就有咗比例代表制（保障民建聯一定有立法會議席，區議會選舉係用單議席單票制，所以民建聯咪輸得慘囉），亦有功能團體議席（有利自由黨、港進聯）。所以咯喎，將來嘅政制檢討，如果有任何改變嘅話，就要等北大人諗到如何將一隻有資格贏嘅馬（例如貝多芬、幸運馬主）可以事先安排到孭一百四十磅兼排在第十四檔，自己屬意嘅馬就排第一檔兼負重一百一十五磅。呢條橋好難度，未必可以在○七年之前諗得掂。四大護法之一嘅蕭蔚雲其實講得清楚，如果北京希望○七年全面直選，《基本法》早已寫到明啦，使乜講「如需修改」啫？「如需」，是甚麼人認為「如需」，斷估都唔會係董建華、曾蔭權、蔡耀昌或者劉慧卿啩？