續約傾唔掂？
馮仁昭四圍超：英皇拉隊開P　Eason冇份

陳奕迅（Eason）因為續約問題而同英皇嘅關係搞得好僵，早排佢喺《叱咤》頒獎禮嘅慶功宴上，當英皇歌手影大合照時，竟然冇人嗌Eason埋位；而前晚英皇歌手喺《勁歌》總選後去咗尖沙嘴美麗華酒店出席大會慶功，之後英皇歌手再拉大隊去跑馬地駿景酒店開party唱K，偏偏都淨係冇Eason份。
前晚喺慶功宴上，Eason同英皇行政總裁吳雨同坐一席，當吳雨被記者包圍講緊Eason嘅續約問題時，坐正喺吳雨隔籬嘅Eason就掛住食，唔做訪問又唔搭嘴，淨係睇住吳雨解話，場面都幾好笑。

冇影響歌手攞獎
雖然吳雨係咁叫大家唔好揣測，公司重好努力斟緊Eason續約，又話「舞影行動」冇影響歌手攞獎，之但係吳雨呢頭講完，嗰頭英皇歌手拉隊唱K，全體得獎歌手容祖兒、Twins、謝霆鋒、吳浩康、Boy'Z都去晒，反而Eason就人影都唔見。
英皇成班歌手玩到凌晨三點幾，至開始散去，楊受成重由佢太太陸小曼做柴可夫接送離場，霆鋒就留到將近凌晨五點先至走，而佢亦都係全場唯一冇fans喺門口等嘅歌手。

黃又南割瘜肉要大休
Shine同李蘢怡噚日出席新城「72金猴迎新歲」活動，佢哋不約而同着晒黑色衫，默默哀悼逝世嘅梅艷芳。Shine嘅黃又南將會喺呢幾日之內做割瘜肉手術，佢話：「因為鼻敏感影響到錄音，所以要做手術，不過做完之後要休息一吓，重要成個月唔好大力整個鼻㖭。」嘩！咁咪連打乞嚏都要忍成個月！

張惠妹個唱搞到地震
張惠妹前晚喺台灣新竹體育館，為一間電子公司嘅活動任壓軸嘉賓，佢着咗馬靴同格仔短裙又唱又跳，現場七千個觀眾都好投入，跟住一齊跳舞，搞到好似地震咁，喺現場嘅保安就嚇到塊面都白埋，驚有意外發生。據講今次阿妹唱一個鐘有成過百萬港幣，如果係真嘅，就真係好和味喎。