天后阿梅今日隆重出殯，殯儀場面，極為墟冚，據香港掌故史專家指出，自從一九六四年林黛食安眠藥、一九七三年李小龍離奇猝死之後，已經未見過咁盛大嘅送殯場面！
不過，好似做戲咁，凡係有場面，就梗有不速之客到場。阿梅喪禮嘅超級殯儀之星，就係「六四反革命暴亂」嘅中國政府第二號通緝欽犯吾爾開希，以中國民運代表及中華民國國民身份，大搖大擺，由台灣飛抵特區。由赤鱲角機場正門堂皇進入，順利過境，毋須通櫃，毋須驗沙士，亦毋須先簽署「我全心全意支持董建華管治香港、全心全意擁護三個代表論及祖國統一」嘅保證書。
嘩，點解突然咁寬鬆？阿董係唔係忽然失憶，唔記得一國兩制，一國為大。吾爾開希係危害「國家安全」嘅現行罪犯，在國外流亡多年，一直未有悔改，今次得阿梅在天之靈保佑，神推鬼囗，自投羅網，阿董重唔飛身撲出，將佢當做季炳雄咁生擒歸案，親自押上北京，立番個功？
親中嗰邊，亦個個啞晒，唔見曾憲梓、鄔維庸蒲頭痛罵阿董失職，可能要等北京主人指示，混亂中剩得個馬力話：今次佢入境係為咗公祭藝人，唔係搞民運，應該冇問題。
唔係搞民運？吾爾開希一到埗，即時瘋狂挑釁我哋尊貴嘅胡溫，指住北面叫囂：「我想告知北京國家胡錦濤主席，讓我們流亡人士回家」。人哋阿胡堂堂國家主席，乜嘢叫做「告知」？
你一開口，我方就要放你回家，咁我國嘅主權何在？吾爾開希雖然着緊套西裝，都重係十四年前見緊李鵬嗰件，對國家領導人充滿蔑視，喺心裏頭，重係着緊當年同一套睡衣。
佢又曲線取笑董建華「母語教學」政策，唔理會特區政府推廣母語及普通話嘅基本國策，竟然用英文話：IaminHongKong。
據八方探知，呢件事已經導致至少三名維園阿伯，岳高頭睇電視嗰陣，痛叫一聲，心臟病暴發。
呢啲就係「民意」嘞，阿董重唔做嘢？
傳真︰2623-9278
電郵︰