踏入二○○四年，大使收到一個好唔開心嘅消息，一位曾經多次喺《暖流》版同蘋果基金活動出現嘅血癌女病人黃詩蓮，已經喺一月五號病逝，得年二十九歲。
大使認識詩蓮兩年幾，感情好似朋友一樣，記得當年佢剛剛由大陸嚟香港探望鄉里，點知抵埗後一直唔舒服，有日重暈倒街上，被送入急症室後，醫生發現佢原來患急性血癌，基於人道理由，院方一直替佢進行治療。
詩連喺香港無親無故，突然間發生咁嘅事，當時佢好彷徨、好無助，生活亦成問題，蘋果日報慈善基金曾經撥款助她，亦一直為佢籌款紓困。
呢段日子，詩蓮嘅病情好反覆，佢試過化療、電療，甚至進行過兩次近親骨髓移植，但似乎冇乜起色，不過，詩蓮一直表現得相當堅強，佢多次同大使講，好唔捨得父母同呢個世界，所以佢會振作，唔會放棄自己。
詩蓮亦係一個心地好好嘅人，記得上年蘋果基金搞咗一個為香港癌症病人呼籲骨髓捐贈嘅活動，當時詩蓮剛剛出院，身體好虛弱，卻堅持出席活動幫手打氣，令大使既感動又欣賞。
可惜一個如此熱愛生命、熱心助人嘅女仔咁早離開世界，大使將永遠懷念呢位好朋友，佢嘅抗癌精神亦都永遠長留喺每一位支持佢嘅讀者心中。
暖流熱線
電話：29908688
傳真：23702192
電郵：
網址：