噚日天朗氣清，最啱就係去郊遊，一班立法會議員同紀律部隊精英，就因為參加無國界醫生搞嘅無國界野外定向比賽，可以一邊比賽，一邊欣賞吓西貢北潭凹嘅明媚風光。
白鴿黨（民主黨）嘅前主席馬丁（李柱銘），噚日就被安排同民建聯前主席曾鈺成同一隊，加埋換衫時大方露出豬腩肉嘅麥國風，重有入境處精英蔡志遠組成「人道救援隊」，帶齊指南針同地圖喺山頭四處跑，好快就搵齊七個指定嘅控制點，重好巴閉咁贏埋另外四隊參加名人邀請賽嘅隊伍。
馬丁事後攬實曾鈺成話，佢哋勝出因為大家「無黨界」，比賽時又無爭拗，合作好好。曾鈺成就歸功於隊長（入境處精英蔡志遠）帶得好，麥國風更加語帶雙關，話一個好嘅領導好緊要，而香港都需要一個好領導咁話，令到呢個健康無比嘅活動，加多咗些少政治色彩。
傳真︰2623-9278
電郵︰