傳統上日本女星拍水着寫真只係佢哋嘅踏腳石，好似藤原紀香同優香咁，紅咗之後即刻惜肉如金嘅例子比比皆是。但近一兩年原本已經可以上岸嘅小池榮子、MEGUMI同佐藤江梨子竟然話對呢樣嘢「永不言休」，行內人重話佢哋帶起咗「免費服務精神」嘅風氣喎。
好似小池姐咁，佢最新出嘅寫真散文集《PARAISO》，搵咗唔興拍水着相嘅名女攝影師蜷川實花操刀，但小池竟然同佢講：「我怕以蜷川嘅風格，會趕走睇開我水着寫真嘅fans，可唔可以拍一啲着番水着嘅相呢？」人哋見佢咁講，惟有話冇問題啦！
不過小池話去到墨西哥影相時，太耐冇影水着，影起相嚟表現得相當尷尬，同佢以前挺起胸膛嘅豪放feel差好遠，可能個人大咗，冇咗嗰種「嚟睇吓我幾正」嘅大膽心態啦。
不過我羅拉覺得，呢兩年乖乖做gym同跳舞嘅小池已經瘦咗唔少，原來佢好唔鍾意做運動，重話：「始終要出嚟見人，我先做咋，我成日諗如果我冇入藝能界，今日一定係肥到大山婆咁！」