阿仙奴同米杜士堡一月份「四回大戰」，上星期六就打完第一場，結果「兵工廠」輕鬆贏波。我求大俠睇完米堡表現，真係驚佢之後「三個回合」全部被KO！
米堡領隊麥卡倫賽後承認防守打得好差，我求大俠都覺得對住阿仙奴，守波無可厚非，但係放棄個中場畀人踢，真係未打已輸。雲格賽後已經百分百保證，唔會畀亨利踢聯賽盃四強兩回合，留番喺三、四、五月衝刺。
雖然𠵱家「兵工廠」鬧前鋒荒，有伯金、韋托特同艾利亞迪里受傷，簡奴又去踢非洲盃，但係如果「米堡」由年三十開始到年初八，連續三次交手好似前日咁踢法，淨係皮利斯同龍格保都掂，長捧阿仙奴過肥年囉！
累馬賽輸波賴冇狀態
巴夫斯上星期幫馬賽喺法國盃贏波，但佢「神經刀」特性又再次出現，上個禮拜六對住歐塞爾，開波三分鐘一次失誤俾對手省入一粒，馬賽最後淨吞兩蛋，巴夫斯賽後就話，狀態未夠。我求大俠好公平，應該畀多兩、三場時間，到時佢再「神經刀」，馬賽可以唔同佢簽長約啫！
倒戈贏波炮轟基瑾
比高域斯剛剛過檔樸茨茅夫打贏曼城，賽後就炮轟曼城領隊基瑾唔用佢，話自己喺每次練習都係最出眾，都冇得上陣，基瑾應該一早被炒魷。不過，呢番言論就連老樸領隊哈利列納都出聲，話佢唔應該咁講。我求大俠覺得，贏波出番啖氣咪得囉，唔使咁勞氣喎。
帕爾馬巴拉福特劏強敵
帕爾馬同埋巴拉福特近期受到財困影響，好多球迷都睇死班球員因為莫財，冇心機踢波，成績每下愈況。點知上個禮拜六，兩隊不約而同贏波，巴拉福特作客贏英甲一哥諾域治，帕爾馬主場贏國米，認真犀利！我求大俠睇住呢兩隊波，真係唔可以睇小「發窮惡」威力！
假期波主隊特別醒神
NBA噚日七場波全部都喺主場球隊贏波，當中好似公牛同巫師兩支弱隊都可爆冷贏黃蜂同76人，其實以我求大俠嘅觀察所得，逢美國當地時間嘅周五同周六，主場球隊唔單止打嚟額外醒神，兼且讓分嘅球隊大多可以贏盤，唔知係咪假期心態睇波嘅擁躉特別多，啲球員打嚟特別賣力呢！