上個禮拜五收市後，港府公布恢復勾地，17幅地皮預計可提供7800個單位，遠比市場預期少。呢個消息本應利好地產股，但事前唔少地產股已經偷步炒高，加上外圍美股上周五回吐幅度唔細，廣州又發現沙士新疑案，港股今日唔排除會出現調整，但估計仍係大漲小回。
正如上周六分析，如果港股周初真係出現調整，可伺機在12900-13000水平低吸恒指Call輪9282、9237或9230。
雖然港股短期或有調整，但幅度料有限，可能在13000之前已經跌唔落，所以唔建議逆勢買恒指Put輪，原因早前亦分析過，首先係牛市買Put輪，等於逆水行舟，肯定事倍功半。
另外係港股近期升得急，Put輪往往跌唔足，令溢價高企，輪價普遍偏貴，就算畀你買中港股調整三四百點，Put輪亦會縮溢價，往往係水瓜打狗唔見一大截，計落唔值博。
另一個風險係一旦睇錯邊，買咗Put輪之後大市掉頭升，原先偏高的溢價未必會繼續偏高，撞啱莊家調整溢價，隻輪隨時會出現暴跌，無端端輸鋪勁。
買Put輪千祈咪心急，應待大市確認轉弱勢之後才出擊，到時唔慌冇水位。在大市出現短暫回吐，大漲小回期間買Put輪，其實係極高危動作。
章盛